सागर भुर्तेल, सिड्नी
नेपालबाट आउनु भएका अभिभावकहरुलाई गैरआवासीय नेपाली संघ अस्ट्रेलिया एनएसडब्लु राज्य परिषद्ले आयोजना गरेको अभिभावक बनभोज कार्यक्रम हिजो २९ फेब्रुअरी शनिबार भव्यताका साथ सम्पन्न भयो । पिकनिकमा ८ सय ५० भन्दा बढी अभिभावकको सहभागिता रहेको एनआरएनए अस्ट्रेलियाका प्रबक्ता नन्द गुरुङले वताए।
बनभोजमा जानका लागि विहानैदेखि सिड्नीका विभिन्न स्थानहरुबाट अभिभावकहरु जम्मा भएका थिए । अभिभावकहरुले वलंगन जाने बाटोमा रहेको नानटेन मन्दिरको दर्शन गर्नुभयो त्यसपछि ”न्यू साउथ वेल्सको नर्थ उलंघनको स्टुअर्ट पार्कमा गएर अभिभावक वृहद् वनभोज कार्यक्रममा परीणत भयो । अभिभावकहरुका लागि योगा कक्षा योग गुरु राजन आचार्य शर्माले सञ्चालन गरे । कसरी हास्न सकिन्छ, खुशीमा के रमाइलो छ भन्ने बारे योग गुरुको प्रवचन धेरैले रुचाएका थिए । योग कक्षा सकिएपछि गैरआवासीय नेपाली संघ अस्ट्रेलिया (एनएसडब्लु राज्य परिषद्) सेक्रेटेरी उषाकिरण बारियाले दोहोरी गीत कार्यक्रम सञ्चालन गरेकी थिइन् ।
कार्यक्रममा अभिभावकहरुको स्वास्थ्य जाँचको व्यवस्था पनि गरिएको थियो । खान खाइसकेपछि औपचारिक कार्यक्रम एनआरएनए अस्ट्रेलियाका सचिव दीपक पहारीले सञ्चालन गरेको कार्यक्रममा एनआरएनए एसीसी डिपुटी कोअर्डिनेटर चुन्ना क्षेत्रीले स्वागत मन्तव्य राखेका थिए । विभिन्न सामाजिक संघसंस्थाका प्रतिनिधिलगायत लब्धप्रतिष्ठित व्यक्तित्वको उपस्थिति रहेको कार्यक्रम सफलताकासाथ सम्पन्न भयो।
