मेलबर्न। प्रसिद्ध गायक तथा संगीतकार प्रेमध्वज प्रधानको १३ औं दिनको पुण्यतिथिमा मेलबर्नमा श्रद्धाञ्जली सभा आयोजना हुने भएको छ।
छातीमा समस्या देखिएपछि सुन्धारास्थित न्यूरो एण्ड जनरल अस्पताल भर्ना भएका प्रधानको बिहीबार(गएको मे ६ तारिख)मा निधन भएको हो।
वरिष्ठ गायक प्रधानको योगदानको स्मरण गर्दै सो दिन गायक गायिकाहरुले उनका कालजयी गीतहरु प्रस्तुत गर्नेछन् । साहित्य संगीत जमघटको आयोजनामा स्थानीय काठमाडौं व्यांक्वेट नर्थ मेलबर्न सिटीमा हुन लागेको कार्यक्रममा सहभागी हुनका लागि भिक्टोरियावासी नेपालीहरुलाई अनुरोध गरिएको छ । उक्त श्रद्धाञ्जली सभा साँझ ६ बजेदेखि हुनेछ।
यो पनि पढ्नुहोस:- गायक प्रेमध्वज प्रधानको बारेमा:-
प्रेमध्वज प्रधान प्रसिद्ध नेपाली गायक हुन्। वि.सं.१९९४ साल असार कृष्णपक्षका दिन सिन्धुपाल्चोक जिल्लाको चौतारामा बुबा रत्नध्वज प्रधान र आमा प्राणदेवी प्रधानको कोखबाट जन्मिएका उनको घरमा साङ्गितिक माहोल थियो।
उनको जिजुबाजे नारायणकृष्ण प्रधान र बाजे उत्तरध्वज प्रधान शास्त्रीय सङ्गीतमा गहिरो रुचि राख्दथे। उनको घरमा दिनहुँजस्तो साङ्गीतिक कार्यक्रमहरू भइरहन्थ्यो। यसैको प्रभावले विस्तारै उनी पनि सङ्गीतप्रति रूची राख्न थाले।
आफ्नो समयका निक्कै चर्चित र स्टाईलिस गायक प्रधानका गीतहरू आज पनि निकै रुचिपूर्वक सुन्ने गरिन्छ।
