धनकुटाको साँगुरीगढी गाउँपालिकामा अवस्थित सिम्सुवा (नमस्ते) झरना युवायुतीको गन्तव्य बन्न थालेको छ । तराईमा गर्मी मौसमको शुरुवात भएसंगै झरनामा पर्यटकको बाक्लो आगमन हुन थालेको हो ।
झरनामा पूर्वञ्चलका सयौ युवायुवतीहरुको आगमन हुने गरेकोे छ । स्थानीय जनसमुदायको पहलमा साविक भेडेटार गाविस,पर्यटन कार्यालय, जिल्ला विकास कार्यालय धनकुटा,पूर्वी शहरी विकास डिभिजन कार्यालय धनकुटा, र सिम नेपाल धरानको सहकार्यमा पर्यटक भित्रयाउने उद्देश्यले २०६७ सालबाट झरनालाई सञ्चालनमा ल्याईएको हो ।
झरना सञ्चालनमा आएपछि स्थानीय स्तरमा उत्पादित साँग सब्जी फलफूल लगायत कृषि उपज गाउँमै बिक्री वितरण गर्न सहज भएको छ । झरना अवलोकल गर्न र झरनामा रमाउन छिमेकी देश भारत र नेपालको विभिन्न स्थानबाट दैनिक ३ सय देखि ४ सय जना र शनिबार बिदाको दिन १ हजार देखि १५ सय सम्म पर्यटक आगुन्तुले झरना प्रवेश गर्ने गरेको झरना व्यवस्थापन तथा सरसफाई समितिका अध्यक्ष दिलिप लिम्बुले जानकारी दिनु भयो ।
