चर्चित रियलालिटी शो ‘नेपाल आइडल’ निर्देशन गरेका लक्ष्मण पौडेलले अर्को सिंगिङ फ्रेन्चाइज शो ‘द भ्वाइस’ नेपाल भित्राउने भएका छन् ।
एपी वान टेलिभिजन मार्फत आइडलको फ्रेन्चाइज नेपाल भित्र्याएर ‘नेपाल आइडल’ सफलरूपमा निर्देशन गरेका उनले ‘भ्वाइस अफ नेपाल’ निर्देशन गर्न लागेका हुन् । ‘द भ्वाइस’लाई एनजी प्रालीले नेपाल भित्र्याएको हो । अडिशन खुलाइएपनि कुन टेलिभिजनबाट प्रशासण गर्ने भन्ने टुंगो लाग्न नसकेको पौडेलले बताए ।
‘कुन टिभीबाट प्रसारण गर्ने भन्ने टुंगो लागेको छैन । अहिले टेलिभिजनहरूसँग कुरा भइरहेको छ । यही साता टुंगो लाग्छ,’ उनले भने । ‘भ्वाइस अफ नेपाल’को टाइटल विजेताले २५ लाख नगद, कार, २० लाख बराबरको भिडियो एल्बम र वल्र्ड टुरको अवसर प्राप्त गर्ने निर्देशक पौडेलले जानकारी दिए । ‘द भ्वाइस’ २०१० मा नेदरल्याण्डमा सुरू भएको हो । यसको फ्रेन्चाइजी विश्वका १९१ मुलुकमा प्रसारण हुन्छ ।
