मुस्ताङ– मुस्ताङबाट यस वर्ष दुई हजार २०० मेट्रिक टन आलु निकासी भएको छ । अनुकूल मौसमका कारण गत वर्षभन्दा यस वर्ष करिब चार प्रतिशतले आलु उत्पादन बढेको जिल्ला कृषि विकास कार्यालय मुस्ताङले जनाएको छ ।
चालु आर्थिक वर्षको सिजनमा जिल्लाभर तीन हजार ६५४ मेट्रिक टन आलु उत्पादन भएकामा दुई हजार २०० मेट्रिक टन आलु निकासी भएको कृषि विकास कार्यालयका योजना अधिकृत तप्तबहादुर गुरुङले जानकारी दिए ।
जिल्लाका किसानले व्यापारीलाई आलु प्रतिकिलो ४० रुपैयाँमा बिक्री गर्दै आएका छन् । यहाँ उत्पादित आलु सबैभन्दा बढी पोखरामा निर्यात हुने किसानले बताएका छन् । अहिले काठमाडौमा सम्म पुर्याएको छ । काठमाडौमा यहाँको आलुको अत्यधिक माग भइरहेको छ ।
‘पोखराका व्यापारीले अग्रिम रुपमा किसानलाई पैसा बुझाएका हुन्छन् ।’ गुरुङले भने, ‘आलु खन्नेबित्तिकै सिधै पोखरा लैजान्छन् ।’ अहिले काठमाडौं पुर्याइएको छ ,काठमाडौमा पनि अत्यधिक माग भएको उहाले बताउनु भयो।
उच्च हिमाली क्षेत्रमा उत्पादन हुने आलु तुलनात्मक रुपमा स्वादिलो हुने भएकाले मुस्ताङको आलुको माग बढेको छ । जिल्लाका १६ वटै गाविसमा आलु उत्पादन हुने भए पनि तल्लो क्षेत्रका लेते, कोवाङ, टुकुचे, मार्फा र जोमसोम गाविसमा तुलनात्मक रुपमा बढी उत्पादन हुने जिल्ला कृषि विकास कार्यालयले जनाएको छ ।
गत आवमा जिल्लामा तीन हजार ५०० मेट्रिक टन आलु उत्पादन भएको थियो । उत्पादन बढाउन किसानलाई ५० प्रतिशत अनुदानमा आलुको बीउ वितरण गरिएको बताइएको छ ।
