काठमाडौं – ऐतिहासिक धरहरा पुनःनिर्माणको लागि समय थप गरिने भएको छ ।
निर्धारित समयमा पुनःनिर्माणको काम नसकिने भएपछि धरहरा पुनर्निर्माणको लागि समय थप गरिने भएको हो ।
पूर्व निर्धारित समय अनुसार आगामी असोज तेस्रो साता सम्म काम सम्पन्न गरिसक्नु पर्नेछ । हालसम्मा ४१ दशमलव ५ प्रतिशत मात्र काम भएकाले तोकिएकै समयमा काम सम्पन्न हुने सम्भावना नदेखिए पछि समय थप गर्न लागिएको हो ।
राष्ट्रिय पुनःनिर्माण प्राधिकरणका सम्पदाविज्ञ राजुमान मानन्धरले निर्माण कम्पनीले एक वर्षको लागि समय माग गरेको जानकारी दिए । तर कति थप्ने भन्ने विषय छलफल भइरहेकाले एकिन नभए पनि कम्पनीकै माग र आवश्यकता अनुसार समय थप गरिने उनले बताए ।
निर्माणको क्रममा अहिलेसम्मा १३ तलाको काम सम्पन्न भएको छ भने १४ तलाको काम भइरहेको छ । निर्माणका लागि हालसम्मा रु एक अर्ब १३ करोड सकिएको मानन्धरले जानकारी दिए ।
दैनिक १५० कामदार नियमित रूपमा निर्माणका लागि खटिए पनि कोरोनाको कारण निर्माण सामग्री र कामदारको अभाव भएकाले निर्माणको काम तोकिएको समय भन्दा पर धकोलिएको हो ।
विसं २०७२ वैशाख १२ गतेको भूकम्पले क्षतिग्रस्त भएको धरहराको पुनःनिमार्णको काम तीन वर्ष बितेपछि अघि बढेको हो । निर्माणको लागि जम्मा रु तीन अर्ब ४८ करोड लाग्ने जनाइएको छ ।
