काठमाडौं-हिन्दु महिलाले मनाउने तीज पर्व अन्तरगत आज दरखाने दिन । विभिन्न मीठा मिठा परिकारका साथ दर खाने चलन छ । आज चेलिबेटि बोलाएर दर खुवाउने गरिन्छ ।
माइतीघर वा आफन्तकहाँ तथा आफ्नै घरमा खिर, हलुवा, ढकनी, घिउ, दही, दूध, मिठाइ, फलफूल लगायतका मिठा परिकारलाई दरको रुपमा खाने प्रचलन रहँदै आएको छ । दर खाएको भोलीपल्ट निराहार ब्रत बस्ने भएकाले त्यसको आडका लागि अघिल्लो साँझ पौष्टिक भएको खानेकुरा खाने चलन रहेको छ ।
हरितालिका तीजका बेला पानीसमेत नखाई ब्रत बस्ने र धेरै नाचगान गरिने हुनाले शक्ति आवश्यक हुन्छ । परापूर्वकालमा देवी पार्वतीले शीवलाई पतिको रुपमा पाउन निराहार ब्रत बसेको र कामना पुरा भएको विश्वासका आधारमा राम्रो पति पाउन र विवाहिताहरुले पतिको सुस्वास्थ्य, दीर्घायु र प्रगतिको कामना गर्दै भोली ब्रत बस्ने चलन रहेको छ ।
पहिले हरितालिका तीजको अघिल्लो दिन एक दिनमात्र दरखाने परम्परा रहेको थियो भने आजभोली राजधानी तथा अन्य क्षेत्रमा एक महिना अघिदेखि नै दर खाने प्रचलन सुरु भएको छ । पछिल्ला तीजमा दरका नाममा विकृती वढ्दै गएको छ ।
पार्टी प्यालेसमा मदिरा सेवन गर्ने अनावश्यक भड्किलो तीज मनाउने कार्यले तीजको अस्तित्व नै संकटमा पर्न थालेको छ । यस बर्ष विश्वभर नै महामारीको रुपमा फैलिएको कोरोना भाइरसका कारणले सरकारले घरमै बसेर दर खाएर रमाईलो गर्नका लागि सबैसमक्ष आग्रह गरेको छ ।
