काठमाडौं – गुल्मीको रूरूक्षेत्र गाउँपालिका ५ मा पहिरोले घर पुरिँदा एकै परिवारका चार जनाको मृत्यु भएको छ ।
माथिबाट खसेको पहिरोसहितको ढुंगाले घर पुरिँदा रूरूक्षेत्र ५ बम्घा आटीपाटाकी ३० वर्षीया बिना माझी (बोटे), उनका छोराहरु ९ वर्षीय सागर, ७ वर्षीय हेमन्त र १० महिनाकी छोरी बिनिताको घटनास्थलमै मृत्यु भएको प्रहरी प्रमुख एसपी राजेन्द्रसिंह खड्काले जानकारी दिनुभयो ।
प्रहरीका अनुसार आमा र छोराछोरीसहित परिवारका चारै जनाको घटनास्थलमै मृत्यु भएको बताउनु भयो ।
बिनाका पति राजु माझी (बोटे) भने रोजगारीको सिलसिलामा भारतमा छन् । उद्धारका इलाका प्रहरी कार्यालय रिडी र जुहाङबाट प्रहरी टोली राति नै घटनास्थलमा पुगेको एसपी खड्काले जानकारी दिनु भयो ।
