सागर भुर्तेल, सिड्नी
सिड्नीबाट प्रकाशित हुने सिड्नी मर्निङ हेराल्डमा विभिन्न प्रोफेसरलाई उदृत गरेर समाचार प्रकाशन भएको थियो । त्यसमा ध्यानआकर्षण भएको भन्दै राजधानी क्यानबेरामा रहेको नेपाली दूतावासले अस्ट्रेलियाली शिक्षा मन्त्रालयलाई पत्राचार गरेको छ ।
राष्ट्रिय पत्रिकामै यस्तो खाले समाचार प्रकाशित भएपछि ६५ हजार विद्यार्थी अध्ययन गरिरहेको नेपाली समाजमा निकै चर्चा परिचर्चा भएको छ। नेपाल अस्ट्रेलियाको ठूलो मानिने शैक्षिक उद्योगमा योगदान दिने तेस्रो मुलुकमा पर्छ।
‘गरिब देशका विद्यार्थी र फि तिर्न नसक्ने अनि काम र दामका लागि कुदने’ जस्ता भनाइ प्रयोग गरेर प्रकाशित यस लेखमा सिड्नी विश्वविद्यालयका प्रोफेसर बारबोन्स एएनयुका प्राफेसर नोर्टनको भनाइलाई आधार बनाइएको थियो।
यसरी अस्ट्रेलियाको शैक्षिक उद्योगमा तेस्रो ठूलो लगानी गर्ने देशका रूपमा २.६ विलियन तिर्ने नेपाल र नेपाली विद्यार्थीलाई मानमर्दन गरेर लेख प्रकाशित भएको थियो ।
यसरी एउटा समाचारले नेपाली समाजलाई तरंगित बनाइराखेका बेला क्यानबेरामा रहेको नेपाली राजदूतावासले सोमबार बिहानै सिधै शिक्षा मन्त्रालयलाई पत्राचार गरेर यस विषयमा जानकारी गराएको छ।
राजदूतावासले अस्ट्रेलियामा अध्ययनरत नेपाली विद्यार्थीहरू अन्य राष्ट्रका झैं यहाँको नीति नियम र परिधिभित्र रहेर सम्बन्धित शैक्षिक निकायको अनुमतिमा अध्ययन गर्न आएकोले यस्तो खाले समाचारले सम्बन्धित मुलुकको छविमा नराम्रो पर्नसक्ने विषय उल्लेख गरिएको थियो।
