स्याङ्जा, असार-६। स्याङ्जाको आँधीखोला तर्ने क्रममा खोलामा बगेका एक पुरुष मृत अवस्थामा भेटिएका छन् ।
पुतलीबजार नगरपालिका-४ राङ्कोषका ५१ वर्षीय टेकबहादुर थापा शनिबार मृतावस्थामा भेटिएको प्रहरीले जनाएको छ ।
जिल्ला प्रहरी कार्यालय स्याङ्जाका प्रहरी नायब उपरीक्षक राजेन्द्रप्रसाद अधिकारीका अनुसार आँधीखोला तरेर पारी जाने क्रममा खोलाले थापालाई बगाएको भन्ने खबर प्राप्त गर्नासाथ घटनास्थलतर्फ गएको प्रहरीको टोलीले थापालाई मृतावस्थामा भेटेको र थापाको शवलाई परीक्षणका लागि जिल्ला अस्पताल स्याङ्जा लगिएको हो।
यो पनि पढ्नुहोस:- मनसुनजन्य विपदमा परेर एक सातामा गुमाए १७ जनाले ज्यान।
पछिल्लो एक सातामा मनसुनजन्य विपदमा परेर १७ जनाले ज्यान गुमाएका छन। प्रहरी प्रधान कार्यालयका अनुसार अविरल वर्षापछि आएको बाढी, पहिरो र डुबानमा परी जेठ ३० यता १० पुरुष, ४ महिला, २ बालक र १ बालिकाको ज्यान गएको छ।
मृत्यु हुनेमा सिन्धुपाल्चोकका ३, डोटीका ३, सप्तरी, काभ्रे, गोरखा, जुम्ला, अर्घाखाँची, पाल्पा, कास्की, कालिकोट, बाजुरा, बझाङ र प्युठानका १÷१ जना रहेका छन्। त्यस्तै बाढी, पहिरो र डुबानमा परी १७ जना घाइते भएका छन्। घाइतेमध्ये १० पुरुष, ४ महिला, १ बालक र २ बालिका रहेका छन्।
बाढी, पहिरोमा परी अहिलेसम्म २२ बेपत्ता भएका छन्। जसमध्ये १५ पुरुष, ५ महिला र २ बालक छन्। उनीहरूमध्ये सिन्धुपाल्चोकका मात्रै २० र बाजुरामा १ र रुपन्देहीमा १ जना छन्।
त्यसैगरी प्रहरीले जनाए अनुसार बेपत्ता हुनेहरुको खोजी कार्य जारी रहेको छ। बाढी तथा पहिरोमा परेका सिन्धुपाल्चोकमा ९४ सल्यानमा ८, दाङका ४ र कञ्चनपुरका ३ गरी १०९ जनाको उद्दार गरिएको छ। त्यस्तै गएको वैशाख यता भने विपद्जन्य घटनामा ७१ जनाको मृत्यु भएको छ भने २४ जना वेपत्ता भएका छन् ।
