एजेन्सी -इण्डियन प्रिमियर लिग अन्तरगत सोमबार राति भएको खेलमा रोयल च्यालेन्जर्स बैङ्लोरले सनराइजर्स हैदराबादलाई १० रनले पराजित गरेको छ। युएईमा जारी लिगमा टस जितेर हैदराबादले पहिले बलिङ गर्ने निर्णय गरेको थियो।
पहिले ब्याटिङ् गरेको बेङ्लोरले निर्धारित ओभरमा ५ विकेटको क्षतिमा १६३ रन बनाएको थियो। यो योगफल तयार गर्ने क्रममा देवदत्त पडिकलले सर्वाधिक ५६ रन जोडे भने एबी डी डिलियर्सले ५१ रन बनाएका थिए।
त्यसपछि जवाफी ब्याटिङमा उत्रेको हैदराबाद १९.४ ओभरमा अलआउट हुँदै १५३ रनमा समेटिएको थियो।
एक समय २ विकेटको क्षतिमा १२१ रन बनाएर बलियो अवस्थामा रहेको हैदरावादले त्यसपछि लगातार विकेट गुमाउँदा खेल बेङ्लोरको पोल्टामा पुगेको हो। हैदरबादले ३२ रन जोड्दा आफ्नो सबै विकेट गुमाउनु परेको थियो।
हैदरबादका लागि जोनी बेयरस्टोले सर्वाधिक ६१ रन बनाएका थिए।लिगको तेश्रो संस्करणपछि बेङ्लोरले आफ्नो पहिलो खेलमा जित हासिल गरेको यो पहिलो पटक हो।
बेङ्लोरका लागि युजवेन्द्र चहलले सर्वाधिक ३ विकेट लिए भने नवदीप सैनीले २ विकेट लिए।
