एजेन्सी-स्पेनिस फुटबल क्लब बार्सिलोनाका कप्तान तथा प्रमुख खेलाडी लिओनल मेस्सीले क्लब छाड्ने निर्णय फिर्ता लिएका छन् । आज शुक्रबार चर्चित खेल मिडिया ‘गोल’सँग कुरा गर्दै अर्जेन्टिनी फरवार्ड मेस्सीले क्लब छाड्ने निर्णय फिर्ता लिँदै आफू बार्सिलोनामै रहने पुष्टि गरेका छन् । क्लब छाड्ने निर्णय ब्युरोफ्याक्समार्फत् क्लबलाई पठाएपछि मेस्सीले एक साता बितिसक्दा पहिलोपटक सार्वजनिक रूपमा आफ्नो धारणा सार्वजनिक गरेका हुन् ।
अन्तर्वार्तामार्फत् मेस्सीले आफूले किन क्लब छाड्ने निर्णय लिनुपरेको थियो र पुनः किन निर्णय फिर्ता लिनुपर्ने अवस्था आयो भन्ने कुरा बताएका छन् । साथै उनले क्लब अध्यक्ष जोसेप मारिया बार्टोमेउ खराब नेतृत्व रहेको र उनकै कारण क्लबमा दुर्घटना निम्तिएको पनि आरोप लगाएका छन् । अन्तर्वार्ताक्रममा मेस्सील भनेका छन्, ‘म क्लब छाड्न चाहन्थें । किनभने, म खुसी थिइनँ । धेरै कुरामा मेरो असहमति थिए । क्लबका अध्यक्ष बार्टोमेउ क्लब नेतृत्वका लागि एक खराब व्यक्ति हुन्, एक दुर्घटनाजस्तै ।’
मेस्सीले क्लब छाड्नेक्रममा आफूले बार्सिलोनालाई अदालतसम्म लैजान नचाहेकैले क्लब छाड्ने निर्णयबाट पछि हट्नु परेको बताएका छन् । ‘जहाँ मैले २० वर्ष बिताएँ र सिंगो जीवन खर्चेर योगदान दिएँ, त्यो क्लबलाई म अदालतसम्म लान चाहन्नथें । यसकारण म यहाँ छु । तर, म कानुनी आधारमा अझै पनि क्लब छाड्न सक्छु,’ मेस्सीले भनेका छन् ।
