आईसीसी टी–ट्वेन्टी विश्वकप छनोट अन्तर्गतको एसिया फाइनलको तेस्रो खेलमा नेपालले कुवेतलाई ७ विकेटले पराजित गरेको छ ।
सिंगापुरस्थित ईण्डियन एसोसियसन क्रिकेट मैदानमा आज बिहान भएको खेलमा कुवेतले दिएको १४२ रनको लक्ष्य नेपालले १५.५ ओभरमा मात्र ३ विकेट गुमाएर पूरा गर्दै जित हात पारेको हो ।
आइतबार आयोजक सिंगापुरसँग हुने अन्तिम खेलमा सिंगापुरलाई पराजित गरे नेपाल ग्लोबल छनोटमा पुग्नेछ ।
नेपालको जितमा कप्तान पारस खड्काले ६८ रनको अर्धशतकीय इनिङ्स खेल्दै टी–ट्वेन्टीमा तीन अर्धशतक बनाउने पहिलो नेपाली खेलाडी बनेका छन् ।
खेलमा शरद भेषवाकरले अविजित ३८ रन जोडे भने उपकप्तान ज्ञानेन्द्र मल्लले १९ रन र रोहित कुमार पौडेलले अविजित ६ रन जोडे । दिपेन्द्र सिंह ऐरी भने १ रनमा आउट भए ।
यसअघि टस हारेर पहिले ब्याटिङ गरेको कुवेतले २० ओभरमा ९ विकेट गुमाएर १४१ रन बनाएको थियो ।
