रुसले युक्रेनमाथिको आक्रमण शुरू गरेको युक्रेनका गृह राज्यमन्त्री एन्टोन गेराश्चेन्कोले बताएका छन् ।
आफ्नो आधिकारिक फेसबूक पेजमा एक बयान पोस्ट गर्दै उनले लेखे, ‘अतिक्रमण शुरू भएको छ । किएभ, खार्किभ र डिनाइपरमा रहेका जंगी अड्डा, विमानस्थल र जंगी गोदाममा क्षेप्यास्त्र प्रहार गरिएका छन् । सीमामा गोली चल्न थालेका छन् । आजको दिनदेखि संसारको नयाँ भूराजनीतिक यथार्थ शुरू भएको छ ।’
त्यसअघि रुसका राष्ट्रपति भ्लादिमिर पुटिनले युक्रेनमा रुसले विशेष सैन्य कारवाही चलाउने घोषणा गरेका थिए ।
रुसी जनतालाई सम्बोधन गर्दै उनले बताए, ‘युक्रेनी र रुसी सुरक्षाबलबीचको झडप अवश्यंभावी छ । नेटोको थप विस्तार र युक्रेनको भूभागमा उसको उपस्थिति अस्वीकार्य छ । रुसको सैन्य कारवाहीले रुसीहरूलाइृ सुरक्षा दिने लक्ष्य राखेको छ ।’
संयुक्त राष्ट्रसंघका महासचिव एन्टोनियो गुटेरेसले पुटिनलाई मानवताको नाममा आफ्ना सैनिकहरू रुसमै फर्काउन आह्वान गरेका छन् ।
एजेन्सी
