अन्तराष्ट्रिय यात्राका लागि विभिन्न प्रतिवन्धहरुसहित बेलायत सरकारले लागू गरेको रेड लिष्टको सूचीबाट नेपालसंगै अन्य ४६ देश हटेका छन् ।
बिहीबार बेलायत सरकारले जम्मा ७ मुलुकलाई मात्रै रेड लिष्टमा राख्दै अन्य सबै मुलुकलाई रेड लिष्टबाट हटाएको हो ।
आउंदो सोमबार बिहान ४ बजेदेखि यो परिवर्तन लागू हुनेछ । अब ७ वटामा सिमित पारिएका रेड लिष्ट मुलुकहरुमा कोलम्बिया, डोमिनिक रिपब्लिक, पेरु, पानामा, इक्वेडर, भेनेजुएला र हाइटी छन् ।
रेड लिष्टबाट हटेपछि अब कोभिड खोपका दुबै डोज लगाएका यात्रुले नेपालबाट बेलायत आउँदा होटेल क्वारेन्टिन बसिराख्नुपर्ने छैन् ।
रेड लिष्टमा रहंदा यूकेका नागरिक र यहाँकै रेसिडेन्स पर्मिट हुनेलाई मात्र खुला राखिएको बेलायतमा अब भने पर्यटक र अन्य भिजिटर पनि आउन पाउनेछन् ।
दशैँको मुखमा नेपाल रेड लिष्टबाट बाहिरिएपछि चाडपर्वमा नेपाल जानेहरुलाई राहत हुने भएको छ । त्यस्तै, इन्टेकको शुरुमा बेलायत आइपुग्नै पर्ने अवस्थाका विद्यार्थीहरुलाई पनि चर्को शुल्कसहितको होटेल क्वारेन्टिनबाट मुक्ति मिल्नेछ ।
