तास्मानियाको नर्थ वेस्ट तास्मानियाका नेपाली समुदायले डेभनपोर्ट र बर्निमा सेप्टेम्बर पहिलो हप्ता दुई छुट्टा छुट्टै तिजको अवसरमा दिदीवहिनीहरुलाई दर खुवाउने कार्यक्रमको आयोजना हुने भएका छन् ।
बर्नि नेप्लिज कम्युनिटीको आयोजनामा बर्निमा आउँदो १ सेप्टेम्बरमा दर खुवाउने कार्यक्रम राखिएको बर्नि नेप्लिज कम्युनिटीका मुगेन्द्र गौतमले जानकारी दिए । कार्यक्रममा सहभागी हुन प्रति व्याक्ति ४५ डलर शुल्क राखिएको छ भने विभिन्न साङ्गितीक प्रस्तुतिहरु हुने आयोजकले जनाएको छ ।
कार्यक्रम साउथ बर्निको द मेनाइ होटेलमा मध्यान्ह ३ बजेदेखि राति ११ बजे सम्म सञ्चालन गरिने गौतमले जानकारी दिए । नर्थ वेस्टका स्थानीयहरूलाई बढ्दै गएको नेपाली समुदायको पहिचान गराउन पनि तिज जस्ता कार्यक्रमले सहयोग पुग्ने गौतमको भनाई छ ।
डेभनपोर्टमा पनि तिज कार्यक्रम हुने
यसैबिच डेभनपोर्ट नेप्लिज कम्युनिटीले पनि ५ सेप्टेम्बरमा तिजको दर खुवाउने कार्यक्रम राखिएको आयोजक समितिको तर्फबाट सुबास मिश्रले जानकारी दिए । नर्थ वेस्टमा बस्ने सम्पूर्ण नेपाली दाजुभाइ तथा दिदीबहिनीहरूलाई कार्यक्रममा सहभागी हुन मिश्रले आग्रह गरेका छन् ।
निःशुल्क प्रवेशको व्यवस्था गरिएको कार्यक्रम लाट्रोव मेमोरियल हलमा मध्यान्ह २ बजेदेखि साँझ ९ बजे सम्म रहने कार्यक्रम आयोजक समितिका चेतन कंडेलले जानकारी दिए । डेभनपोर्टको तीज कार्यक्रमलाई सवै तिरबाट चासोका साथ हेरिएको भन्दै आयोजक समितिका मिश्रले भने ”एनआरएनए तास्मानिया तथा विभिन्न व्यवसायीहरूले पनि एक्यबद्ता र सहयोगको प्रतिबद्धता जनाएका छन् ।”
पिआरको सम्भावना खोज्दै पछिल्लो समय नर्थ वेस्ट तास्मानियामा नेपालीहरूको आगमन बढ्दो छ ।
