सुभाष मिश्र लन्सेस्टन, ताज्मानिया
नेपाली सोसाइटी अफ नर्देन ताज्मानियाद्वारा सञ्चालित नेपाली भाषा सिकाउने र संरक्षण गर्ने उद्देश्यका साथ सन् २०१८ मा स्थापना भएको भाषालयको अभिभावक दिवस २०२० सम्पन्न भएको छ। प्रवासी संसाधन केन्द्र म्वब्रेमा सम्पन्न कार्यक्रममा बाक्लो संख्यामा अभिभावकहरु, संस्थाका प्रतिनिधीहरु र उत्तर-पश्चिमी भेग डेभनपोर्टबाट समेत सहभागीहरु उपस्थित थिए ।
विभिन्न उमेर समुहका बालबालिकाले विभिन्न किसिमका सांस्कृतिक तथा नेपाली भाषामा कार्यक्रम प्रस्तुत गरेका थिए। बालबालिकाको विगत र अहिलेको भाषा उपलब्धीलाई स्मरण गर्दै संस्थाका अध्यक्ष नवराज मुडवरीले सिकाइलाई व्यावहारिक पक्षमा जोड दिएकोमा भाषालयको प्रशंसा गरेका थिए। भाषालयका संयोजक शेखर केसीले भाषालयको उपलब्धीको लागि योगदान पुर्याउने सबै पक्षलाई धन्यवाद दिनुहुँदै आउँदा दिनमा यसलाई व्यापक बनाउन सबैको सहयोगको आवश्यकता औंल्याउनु भयो ।
अभिभावक रवि शाहले भाषालयका शैक्षिक क्रियाकलाप जीवनोपयोगी र गुणस्तरीय रहेकाले अझ उत्तरोतर प्रगतिको कामना गरेका थिए।
