अष्ट्रेलियाको सुन्दर राज्य ताज्मानियाको उत्तर–पश्चिम भेगमा अवस्थित डेभनपोर्टमा नेपाली समुदायको पहलमा दशैँ र तिहारको उपलक्ष्यमा एक सांस्कृतिक तथा शुभकामना आदानप्रदान कार्यक्रम सम्पन्न भएको छ । छरिएर बसेका नेपालीहरुलाई एउटै छातामुनि ल्याउने उद्देश्य रहेको उक्त कार्यक्रमबाट संकलित रु २ लाख ७६ हजार रकम नेपाल स्थित प्रतिष्ठित संस्था ‘राष्ट्रिय आविश्कार केन्द्र´लाई हस्तान्तरण समेत गरिएको छ।
राष्ट्रिय आविश्कार केन्द्रका प्रमुख महाविर पुनले समुदायलाई धन्यवाद दिँदै यो रकम कोरोना विरुद्धको अभियानमा खर्च गर्ने जानकारी फेसबुकमार्फत दिएका छन् ।
करिब ३ वर्ष अघिबाट नेपाली समुदायले औपचारिक रुपमा यस भेगमा बसोबास सुरु गरेका थिए । समाजका अगुवा सुभाष मिश्रका अनुसार अहिले करिब ३ सयको हाराहारीमा नेपाली समुदाय यस भेगमा बसोबास गर्ने र बढ्ने क्रम बढ्दो छ । मिश्रका अनुसार यस कार्यक्रममा करिब १६० जना सहभागी थिए जसमा करिब ३० जना स्थानिय व्यक्तित्वहरुको सहभागीता थियो ।
कार्यक्रमका एक परिकल्पनाकार वासुदेव सापकोटाले कार्यक्रमको महत्व औल्यादैँ यो कार्यक्रम स्थानियहरुको विचमा गर्न पाउँदा नेपाली संस्कृति, परम्परा, भेषभुषा तथा परम्परागत खानेकुराको स्थानिय
तहमा परिचित गराउन सकिएको विचार राख्दछन् । करिब ४ घण्टा सञ्चालित कार्यक्रम पहिलो तर भव्य भएको थियो । ताज्मानियमाको उत्तरी भेगबाट समेत नेपालीहरु यस कार्यक्रमको लागि सहभागि भएका थिए ।
कार्यक्रम अग्रजहरुबाट टीका ग्रहण गरि शुरु गरिएको थियो । नेपाल जानकार स्थानिय व्यक्तित्व तथा काउन्सीलका सदस्यहरु समेत सहभागि यस कार्यक्रमले स्थानिय तहमा महत्वपूर्ण अर्थ राख्ने आँकलन गरिएको छ ।
