एजेन्सी- बार्सिलोनाका कप्तान लियोनल मेस्सीले क्याप नाेउ नछोड्ने मनसाय बनाएको बताइएको छ ।
अर्जेन्टिनी स्टार मेस्सीका बुबा जर्ज मेस्सी र बार्सिलोनाका अध्यक्ष जोसेप मारियाबीचको भेटपछि सर्वाधिक धेरै छ पटकका बालोन डी‘ओर विजेता मेस्सीले क्लब नछोड्ने मनसाय बनाएको बताइएको छ ।
मेस्सीका एजेन्टसमेत रहेका जर्ज मेस्सी र बार्सिलोनाका अध्यक्ष बार्टोमेउले क्लब छोड्ने निर्णय लिएका मेस्सीको विषयका लागि भेटघाट गरेका थिए ।
बुधबार मेस्सीका बुबा अध्यक्ष बार्टोमेउसँग भेट गर्नका लागि बार्सिलोना आएका थिए । हिजो बिहान बार्सिलोनास्थित एल पार्ट एयरपोर्टमा देखिएका उनले अध्यक्ष बार्टोमेउसँग भेट गरेका थिए ।
जसमा, उनीहरूबीचकाे भेट सकारात्मक भएका कारण मेस्सी बार्सिलोनामै बस्ने मनसायमा पुगेको ‘गोल डटकम’ले जनाएको छ ।
जर्ज मेस्सीले बार्टोमेउसँगको भेटघाटपछि पत्रकारसँग कुरा गर्दै मेस्सी क्याप नोउ नछोड्ने मनसायमा पुगेको बताएका हुन् ।
३३ वर्षीय मेस्सीले एक साताअघि क्लब छोड्ने जानकारी बार्सिलोनालाई गराएका थिए ।
मेस्सीले बार्सिलोनाबाट निरन्तरता नदिने भन्दै यसै समरमा क्लब छोड्ने वातावरण मिलाइदिन बोर्डसँग प्रस्ताव राखेका थिए ।
मेस्सी र बार्सिलोनाबीचको सम्झौता आगामी सिजनमा सकिँदै छ ।
