काठमाडौँ – कालीकोटको तिलागुफा नगरपालिका-१ नाग्म बजारमा पहिरो जाँदा एक बालकको मृत्यु भएको छ ।
आज बिहान गएको पहिरोमा परी तीन घर पुरिएका छन्। पहिरोमा पुरिएर पाँच वर्षीय बालक निराजन शाहीको मृत्यु भएको जिल्ला प्रहरी कार्यालय कालीकोटका प्रमुख प्रहरी नायब उपरीक्षक श्याम ओलियाले बताउनु भयो ।
“पहिरोबाट १३ वर्षीय बालक अर्जुन हमाल र ३५ वर्षीया पुण्य शाहीलाई जीवितै उद्धार गरिएको छ,” उनले भने, “फोन सम्पर्क नहुँदा पूर्ण विवरण आउन सकेको छैन ।”
प्रहरी र एस्काभेटरको प्रयोग गरी अहिले उद्धारको काम भइरहेको छ । घटनास्थल जुम्ला र कालीकोट जिल्लाको सिमाना नजिक कर्णाली राजमार्गको कालीकोट सडक खण्डमा पर्दछ ।
जुम्लाका प्रमुख प्रहरी नायब उपरीक्षक लालबहादुर धामीले जीवितै उद्धार गरिएका घाइतेलाई उपचारका लागि कर्णाली स्वास्थ्य विज्ञान प्रतिष्ठान जुम्लामा ल्याउँदै गरिएको जानकारी दिनुभयो ।
