स्पेनिस क्लब एथ्लेटिको मड्रिडका भेट्रान खेलाडी डिएगो कोस्टाविरुद्ध कर छलीको मुद्दा दर्ता भएको छ । स्पेनिस खेलाडी कोस्टाले कर छली गरेको अभियोगमा अदालतमा मुद्दा दर्ता भएको हो । स्पेनका कर अधिकारीले कोस्टाले कर छली गरेर राज्यलाई ठूलो आर्थिक घाटा पुराएको अभियागसहित मुद्दा दर्ता गराएका हुन् ।
कोस्टाविरुद्धको मुद्दाको छिनोफानो आगामी जुन ४ तारिखमा हुने स्पेनिस मिडियाले जनाएका छन् । अभियोगअनुसार कोस्टाले सन् २०१४ मा इंग्लिस क्लब चेल्सीमा सरुवा हुँदा १ मिलियन युरोभन्दा बढी राज्यलाई ठगेको आरोप लागेको छ । साथै, उनले तस्बिर अधिकारबापत पाउने १ मिलियन युरोभन्दा बढी आम्दानी पनि लुकाएको बताइएको छ ।
यदि कर छली मुद्दामा कोस्टा दोषी ठहर भए उनीमाथि ६ महिनाकाले जेल सजाय हुनेछ । त्यस्तै, उनलाई ५ लाख युरोसम्मको जरिमाना पनि हुनेछ । तर, स्पेनको कानुनअनुसार हिंसात्मक अपराध नगरेको अवस्थामा २ वर्षसम्मको जेल सजाय हुँदा जेल नै बस्नु भने पर्दैन । उनीहरूले त्यसबापत आर्थिक क्षतिपूर्ति तिरे हुन्छ ।
